講題:信仰的傳承
- 經文:馬可福音16:15-16
- 使徒行傳16:31
- 講師:林保順牧師
各位長執弟兄姊妹大家新春恭喜!首先要感謝上帝的保守帶領咱大家平安度過新年，迎接新春的喜樂!真歡喜今日受黃牧師的邀請有機會和咱大家同心來敬拜上帝，今早起微細的奴僕通過馬可福音16:15-16以及徒16:31的聖經來喚起咱大家愛重視咱所得著寶貴的信仰，傳承的問題。
咱所有的基督徒，攏確信咱的主耶穌基督佇二千多年前親自對天降臨，道成肉體來到這世間，為著欲救贖咱的罪，甘願替咱死佇十字架頂，經過埋葬第三日對死復活，經過40日才佇眾學生面前來升天的時，有交託學生重大的使命講:「恁去普天下傳福音，互萬百姓，信來受洗禮的，欲得著救;呣信的，欲受定罪。」因為按呢咱每一個蒙恩的子兒，也就是所有主耶穌基督的門徒，必須愛有義務來回應主耶穌的恩召，備辦咱的心，隨時會凍為主做美好的見證，來盡咱的主所交託咱的大使命。
擱佇使徒行傳16:31對咱每一個人所呼召的講:「著信主耶穌你就得著救以及你的家。」這個背景是使徒保羅和西拉為著實踐主耶穌所交託的大使命，做夥傳道旅行的時，佇腓立比地區為著傳福音的緣故受掠關落監，特別以重大的罪名關佇內庭監的內面，閣用柴楗，楗的腳，若是佇半冥的時，因猶有彼個心情啲吟詩嘔咾祈禱上帝，所有的囚犯攏感覺奇怪，入監的時上司官剝的衫，命令用棍拍，才關落內庭監，已經完全失去自由的人，猶久有這種心情啲吟詩。忽然間地大震動，致到監的地基攏搖動，監獄的門連鞭攏開，犯人的刑具麻攏落去。顧監的人被搖醒起來，看見監門攏開，拍算監囚攏已經逃走，所以真著驚，看代誌真正不妙，上司若追究責任，是擔不起，為著職責的關係，就拔刀欲家己刣，若是保羅看見這個情形，趕緊大聲叫講:「莫得家己傷害!阮攏佇遮。」顧監的人趕緊叫人櫸火把來，跳入去愕愕惙惙仆佇保羅西拉的面前，導出來，講:「先生啊~我著怎樣做才會得著救?」保羅應講:「著信主耶穌，你就得著救以及你的家」就用主的道理講互伊及伊家內攏總的人聽。(使徒行傳16:26~32)。佇遮保羅所講:「著信主耶穌，你就得著救以及你的家。」這句話實在真重要，只有一條路就是必須要信靠主耶穌才會凍得著救。請咱特別注意下一句所講:「以及你的家」是甚麼意思呢?是不是一個人信耶穌按呢全家就攏得著救嗎?答案絕對不是按呢!今仔日有多多的基督徒攏誤解這句話，所以認為一個家庭若有一個信仰告白領受洗禮信靠主，按呢一個家庭只要一個代表去做禮拜信耶穌全家著攏得著救啊!這是錯誤的見解。若按呢佇遮所講「以及你的家」是甚麼意思?就是一家庭若有一個信耶穌做救主得著寶貝的救恩，就會真要緊家內猶未信耶穌的兄弟姊妹抑是某子抑是尪婿親人，就會真關心致意，常常為代禱，尋機會帶領去教會做禮拜，聽道理，並且家己信耶穌了後，咱的生命得著完全改變成為一個重頭生新創造的人，佇生活上互人看見生命改變與以前的做人完全無仝款充滿喜樂的人。對按呢全家的人看在眼內，就有機會全家攏歡喜跟隨你來信耶穌得著救啦!咱看這個顧監的獄卒，聽保羅的話就導全家的人攏作夥來聽保羅詳細講主的道理，按呢全家就攏受洗禮接納主耶穌做每一個人的救主，成為基督徒。所以保羅所宣告的這一句話就是提醒咱每一個人攏必須要信靠主耶穌才會得著救。這是真重要的提醒，咱攏必須將咱已經得著的救恩，這個寶貴的信仰的香火一定要傳互咱的子子孫孫，一代傳過一代，這個信仰的傳承絕對不通中斷。特別做家長的人攏著真要緊有責任引導家內的每一個人，確確實實攏有接納主耶穌做每一個人的救主。咱凍自私自利占為己有「咱攏著吃好倒相報」攏有義務愛與人分享的。
咱看見上帝創造世堅與人類萬項有以來，佇創世記看見古昔上帝有揀選人做祂的百姓，然後對諸個受恩的子兒將上帝的愛的恩典一代擱一代繼續傳承落去，親像亞伯拉罕傳互以撒，以撒傳互雅各，雅各傳互約瑟，按呢一直傳承互萬族得著福氣。當上帝呼召亞伯蘭的時對他講:「你著離開本地本族老父的家，去我所欲指示你的地，我欲互你成為大國，我欲賜福你，互你的名做大，你也欲互人得著福氣。」(創12:1-3)「亞伯蘭就照耶和華吩咐的話就去，羅得也佮他去，亞伯蘭出哈蘭的時，75歲，亞伯蘭導伊的某，撒萊及伊的姪子羅得，以及佇哈蘭所積聚的財務，所得著的人額，就出去欲去迦南地。」(創12:4-5)，咱若對屬靈的意義來講，咱每一個基督徒，攏有佮亞伯蘭真相款的經歷。咱今仔日會通成為快樂的基督徒，嘟嘟親像亞伯蘭的老父他拉的一家，對拜偶像的吾珥城，離開著拜偶像充滿罪惡的地遷涉到哈蘭，然後才進入迦南美地。
咱今仔日會凍成為基督徒，麻是要大先有決心離開過去所有的罪惡，有決心有行動接受主耶穌基督做咱每一個人的救主，成為新創造的人基督徒，然後才會通進入主耶穌為咱所備辦的救恩，會通享受永遠活的福氣。上帝疼咱，拯救咱，並不是只為咱一個人會凍進入祂豐富的活命而已。上帝更加期待咱所有的基督徒，會通引導咱每一個人的家庭全家攏歸主，仝時麻期待咱所徛起的四週圍的社區，親朋好友攏會通通過咱日常生活上攏有好的見證，來感動通得著救恩的福氣。現在容我來講起微細的奴僕的家族怎樣來信耶穌以及怎樣傳承這個寶貴的信仰來佮咱相佮分享。這個見證是我的家父講互阮聽得。
佇144年前的主後1874年，我的阿祖徛起佇北宜公路，離開新店街仔，大約一點半鐘的路程，地名叫做十份仔的山頂，經農作茶，有一日來新店街仔補貨(日常用品)。聽人啲講佇滬尾(淡水)有一個鬍鬚番啲傳甚麼叫做番仔教，講若心內無平安的人，只要藉著祈禱創造天地萬物的上帝，就會通得著平安。我的阿祖感覺真好奇，原來我的祖先做山耕農以外，擱兼啲做乩童。佇伊的胸前，常常抱著一尊柴頭所雕刻的太子爺，燒香求神明來附身做乩童。替人求平安，指示明路。但是自己的厝內攏無平安。因為我有一個叔公，身體真虛弱常常生病，10外歲就來別世。因為按呢，聽講會通得著平安的番仔教祈禱甚麼造物主上帝就會平安的消息，就想欲去探一個究竟。所以準備有一日的拜六，透早就下山步行大約數公里遠的滬尾(淡水)住一冥，禮拜早起探聽鬍鬚番佈道講道理的所在，去聽道理。
原來這個鬍鬚番的名叫做偕叡理牧師，是對加拿大遠渡重洋來的宣教師，他是佇1872年的3月9日佇淡水上陸的，因為語言通，就佇淡水的炮台埔尋飼牛囝仔做朋友學台語，經過一年久的學習，就會通用台語佈道講道理，上帝有賜互伊聰明智慧，所以伊的學識真廣博，又精通天文地理，是一個真罕有的青年才俊。我的阿祖專工去聽伊佈道講道理，感覺他所講的真新奇講了擱真有理氣，所以連續去聽幾次，真致意去聽道理，就決心無欲擱拜太子爺，做乩童，而且學習會曉祈禱，感謝上帝聖神做工感動伊。伊的心內有領受著真平安。經過幾個月後的七月中，偕牧師有導學生區新店地區佈道傳福音替人拔牙齒。當時有一位名叫高夏嫂，伊有一間厝欲出租卻無人敢租，因為風聲講這間厝會鬧鬼。高夏嫂請偕牧師看這間厝是不是有合適做佈道所，偕牧師看了講可以就租落來做佈道所。對按呢我的阿祖每禮拜只要走一點半鐘的路來到新店街仔聽道理做禮拜就呣免擱走數外公里去淡水听道理。後來高夏嫂听道理也信耶穌，成為新店教會真熱心拍拼為主做見證，服事主的姊妹。
我的阿祖雖然經過一年外就決志受洗禮信耶穌，但是真可惜，對頭到尾只有他一個人去做禮拜，並無帶領厝內的人做夥去听道理做禮拜，他就是犯著一般的人所犯的錯誤的觀念。以為一個人信耶穌就會通保證全家的人攏會得著保庇得著救，這種錯誤的想法。我的阿祖信耶穌經過16年後就蒙主恩召安息主懷。事前他有交代我的阿公，他的後事要以基督教的儀式做告別式。所以新店教會傳道先生導會友去主持告別式。後來我的阿公听厝邊的序大前輩對伊講:你實在真不孝，恁兜的家產攏是恁老父一生打拼所建置的，你竟然無去請師公來給他做公德，為他超渡，互伊佇陰間啲受苦，為著按呢我的阿公就去請師公給伊做公德。了後就幫担師公籠返去新店街仔就佇街路啲行的時，高夏嫂看到伊就出聲叫講:德仔，德仔你去叨位?他就叫阿姑!我是請師公為我的老父做公德啦!担師公籠返去師公兜啦!高夏嫂听了真無歡喜講:”你較倚來，我用柺頭摃一下互你”恁老父信耶穌已經受主接納安息佇天堂你擱佮伊做甚麼公德?!你是將伊一生打拼所建置的家財”做共鼓，加它鼓了了若定”唉!講起來麻凍怪你，因為你攏無來做禮拜听道理，所以你才會呣識道理，才會按呢擱去做甚麼公德。擱幾日就是禮拜日，你一定要來听道理做禮拜，若無你永遠嘛呣識道理，我的阿公講好啦!好啦!到禮拜日早起高夏嫂佇教會門口看他來就真歡喜講:你果然有來!阿姑所交代的一定要來啦，彼日做禮拜有真注意傳道先生所講的道理，講:咱每一個人必須信耶穌才會得著真正的平安。信耶穌敬拜上帝親像咱每日吃三頓同款。咱的肉體是靠吃米飯、菜蔬五穀，才會活，但是人的靈魂是靠吃天理，听道理是個人听個人得，並不能委託別人替你听的。親像咱吃三頓，各人吃各人飽，是凍因為你無時間，叫別人替你吃的。所以听道理信耶穌得著救恩是每一個人直接與上帝的關係，我的阿公听了，反覆思考這個道理，心內想講:他的老父自己去听道理信耶穌，他的心靈得著飽足，但是厝內的人攏放得飢餓。感謝主，聖神感動，開伊的心竅，一個想就想通，因此就決定每禮拜要來做禮拜，听道理信耶穌，做伊個人的救主。
原來我的阿公時常替人算命畫平安符，替人號名，秤命造流年等等。雖然結婚已經六年久攏無生子，當他听道理做禮拜信耶穌了後就學會曉祈禱，他祈禱上帝若賞賜互他有子兒，他的確會帶領去讀主日學听道理做禮拜，用按呢與上帝立約。感謝上帝真正有听他的祈禱，過一年後連續生七個，六男一女。我的阿公為了履行與上帝所立的約，會走路的自己走，叫細漢的就用米籟用担的去教會上主日學做禮拜。厝邊的人看他去落教無擱替人算命就對他討算命的書冊，我的阿公講，我現在已經知這是迷信，通幫助人，我自己已經無愛呀，欲若會用得給人呢?所以攏把它燒掉啦!向望你們著佮我來信耶穌，敬拜創造宇宙萬物的主宰天父上帝才是正確。
根據台神的院訊第158期，台神院長陳尚仁牧師講:家庭是傳福音的第一線，有53%的基督徒是經由家人來得著信仰的。其中有37%的 基督徒是受著父母的影響。所以父母欲怎樣教導兒女的信仰，以及欲怎樣向家內的人傳福音是一件真重要的信仰課題。
因為按呢，耶穌基督的救恩臨到我的阿祖與阿公這個家庭，可以說信仰的傳承是極其重要的問題。所以家長對子兒孫的關心督促對主日學教育來開始，有始有終是凍放鬆的。必須互自而序細養成習慣，禮拜日必定要去上主日學，做禮拜。我的阿公就是按呢督促教導阮所有的序細，必須要跟隨序大人的信仰腳步。
所以今仔日藉著新春禮拜的機會勉勵大家要重視信仰的傳承，就是每一個基督徒攏愛真積極履行主耶穌所交託的大使命必須一代一代傳承落去。
自從我的阿公所傳承落來的子孫總共120外人，現今分散佇台北市、新北市各教會參與服事做禮拜，到目前為止全家族已經有七位獻身做牧師佇各教會事奉上帝真感謝上帝的帶領賜福。
咱長老教會的信仰精神是「棘焚而不燬」的信仰，台灣基督長老教會的歷史已經有150外年，雖然佇各時代攏有無仝款的挑戰與迫害的試煉，但是咱教會的薪火猶原一直焚燒而不燬，攏會通堅守福音的真理，一直動搖，時時刻刻以榮光上帝來徛在，佇咱所相信這個寶貝的信仰一代一代親像接力賽同一樣，一棒接過一棒，會凍確實傳承落去，來盡咱的主所交託互咱每一個人的大使命。